“La notte dei saldi 2010”, negòtzios abertos fintzas a mesunote in sas arrugas de su tzentru de Casteddu

Dd’ant a fàghere custu sero “La notte dei saldi 2010”, aparitzada dae cunsòrtzios de butegheris cun s’agiudu de s’Assessoradu comunale a sas Atividades Produtivas. Sa manifestatzione, chi dda faghent sa matessi die de s’inghitzu ufitziale de sos prètzios imbaratados, at a èssere printzipiada in sas arrugas traditzionales de su shopping, cun ispetàculos, mùsica, animatzione e gazebo ue ant a dare inditos pro sa còmpora e subra sa mapa de sos ispetàculos.

CASTEDDU - S’eventu “Notte dei saldi” est comomai unu fenòmenu culturale chi s’est isparghinadu in totu Itàlia, unu atòbiu gosadu non feti dae sas famìlias, ma fintzas dae una truma de mannos e minores. Una note chi si distinghet dae sa gana de istare paris, de si disvariare, de bìvere sa tzitade.

Sa partetzipatzione de de sos esertzìtzios pùblicos: non feti bar e ristorantes, ammaniados bene pro sa “maratona” in su donare cosa de bufare e papare, ma fintzas esertzìtzios cummertziales de onnia casta, chi ant a animare sos tretos issoro cun mùsicas e fainas pro sos clientes. “Semus cumbintos – at naradu s’assessore a sas Atividades Produtivas, Paolo Carta – chi custa manifestatzione siat una ocasione de importu non feti pro nde dare una istrantagiada a sa tzitade, a su tzentru istòricu cosa sua e a sas atividades presentes, ma fintzas unu mèdiu de promotzione de su territòriu in su cummèrtziu”. S’incingiada est pro sas 9 de sero. Negòtzios, ristorantes e bar ant a mantènnere sas serrandas artziadas fintzas a mesunote in sas arrugas de su shopping, animadas dae paritzos artistas de bia, grupos musicales, una banda musicale bandulera e fintzas giassos intregados a sos pipios cun contos e buratinos.

Ultimo aggiornamento: 11-07-2010 18:08

Progetu realizadu cun s'agiudu de sa Regione Autònoma de Sardigna
L.R. 26/97 subra sa limba e sa cultura sarda