Vetura scòpiat in pratza Giovanni XXIII, timoria a su note in Casteddu
Timoria manna eris sero in pratza Giovanni XXIII in Casteddu pro s’iscòpiu de una vetura parchegiada in sa corte de sas iscolas. A oras de sas 23 una Ford chi fiat in sas àreas de sosta de sa corte a palas de s’iscola Michelangelo at leadu fogu. A sas pampas sunt bastados pagos minutos pro si nde papare sa vetura finas a dda fàghere iscopiare. Intreventu lestru de sos Vìgiles de su Fogu e de sa Politzia, chi ant transennadu su tretu.
CASTEDDU – Unu sero de basca, cun sas fentanas abertas e fortzis una passigiada, in pratza Giovanni XXIII est acabada cun unu parchègiu transennadu e sas luminares de sa Politzia, Vigiles de su Fogu e artifitzeris prontos a nde istudare una bomba.
Totu est cumentzadu a oras de sas 23, cando paritzos testimòngios ant cunfirmadu de àere intèndidu fragu de abrugiadu. Fiat una Ford parchegiada in sa corte de s’iscola Michelangelo de pratza Giovanni XXIII.
Calicunu contat chi at bidu unos cantos piciocos fuende-si-nche, e custu at fatu pensare a unu fogu dolosu. Colant pagos minutos e sa vetura si dda papant sas pampas, fintzas a iscopiare ponende in allarme totu s’apendìtziu. Luego lompent sos Vigiles de su Fogu e sa Politzia, paris a sos artifitzeris.
Sas fortzas de s’òrdine tenent dudas a pitzu de sa seguràntzia de sa pratza. A pustis serradu su parchègiu e iscruculladu cun cura totu su giassu, colada mesunote sos militares ant liberadu s’àrea, mentras unu carruatretzos si nde leaiat sos restos de sa vetura iscopiada. Sas indàgines mirant a donnia mori.
Progetu realizadu cun s'agiudu de sa Regione Autònoma de SardignaL.R. 26/97 subra sa limba e sa cultura sarda
