Inchesta a pitzu de s’eòlicu. Arrestadu Flavio Carboni

A Flavio Carboni, s’imprendidore paradu suta inchesta pro su business de s’energia eòlica in Sardigna, dd’ant arrestadu custu mangianu sos carabineris, a segus de s’òrdine de sa magistradura romana, e giutu in sa presone de Regina Coeli.

ROMA- A Flavio Carboni, s’imprendidore paradu suta inchesta pro su business de s’energia eòlica in Sardigna, dd’ant arrestadu custu mangianu sos carabineris, a segus de s’òrdine de sa magistradura romana, e giutu in sa presone de Regina Coeli.

S’avocadu de Carboni, Renato Borzone, at giai annuntziadu chi at a fàghere recursu a su tribunale de su riesàmene.

Sos magistrados romanos ant pedidu s’arrestu fintzas de àteras duas pessones: Pasquale Lombardi, giai esponente locale de sa DC campana, e sìndigu de sa bidda cosa sua in provìntzia de Avellino e s’imprendidore campanu Arcangelo Martino, pro sos cales si pensat chi apant fatu reatu, in prus de cussu de assòtziu pro delìncuere, fintzas de violatzione de sa Lege Anselmi subra de sos assòtzios segretos.

A parre de sos giùighes sos tres òmines diant dèpere èssere cumponentes de una superlògia segreta, puntu de referimentu pro ghiare a polìticos e imprendidores.

S’inchesta de sa procura romana est cumentzada unos cantos meses a oe pro iscarotare unu comitadu de afàrios chi paret apat manigiadu s’intregu de una filera de apaltos pùblicos in Sardigna pro fraigare parcos eòlicos.

In s’inchesta subra de su business de s’energia eòlica sarda est indagadu galu su coordinadore de su Pdl e fintzas deputadu Denis Verdini (chi s’est semper declaradu foras de sa chistione).

Ultimo aggiornamento: 11-07-2010 18:07

Progetu realizadu cun s'agiudu de sa Regione Autònoma de Sardigna
L.R. 26/97 subra sa limba e sa cultura sarda