Arrefudus perigulosus: muntonàrgius mannus medas intra de Nùgoro e Ollasta

120 milla mètrus cuadraus de terrenus imperaus comenti a muntonàrgiu abusivu po donnia spetzia de arrefudus ddus ant postus asuta secuestru de sa Guàrdia de Finantzia. 18 is persònis giai sinnaladas a s'autoridadi giugitziaria cumpetenti, àteras invecias funt ancoras de ddas arreconnosci. Custus funt is primus arresurtaus de s'oberatzioni "Clean Spring", ghiada de su cumandu provìntziali de is framas grogas de Nùgoro.

NÙGORO - Arrefudus spetziàlis, perigulosus e incuinantis meda stugiaus in muntonàrgius a beru a celu obertu, in terrenus de propiedadi siat comunali siat privada. A Nùgoro, acanta de su centru bìviu, is framas grogas ant apubau cuatrus giassus mannus casi 110 milla mètrus cuadraus, apicigaus a s'arruga, aundi ant agatau materialis de arrisulta chi ndi benit de su sciorrocamentu de fabricaus edilìtzius, lana de ovinus, arrodas bècias, birdis, plàstica, metallus e puru muntonis de lastras de eternit chi tenit amiantu. In su territoriu de Posada, sa Tenentzia de sa Guàrdia de Finantzia de Siniscola at sutapostu a secuestru casi 4 milla mètrus cuadraus de terrenu comunali, donau a imperu tzìvicu e distinau a pastura de bestiàmini, aundi ddus stugiant arrefudus perigulosus chi ndi beniant de veturas a motori e arrimorchius arrogaus , materialis ferrosus, baterias de màchinas e arrefudus medas de domus. Sa periculosidadi in custu atopu s'agatàt in s'amisturamentu probabili de duus arrius d'acua chi ndi calant in su stani de acanta. Is militaris de sa Brigata de Ìsili invecias ant arrilevau, in d-una àrea privada de casi milli mètrus cuàdraus in d-una zona industriali de sa bidda, sa presèntzia de arrefudus spetziàlis e perigulosus: amuntonadoris de currenti, arrodas bècias de màchina, carradas de lubrificantis, plastica. Infinis in su territoriu de Ilbono, ant agatau unu muntonàrgiu aìnturu de unu terrenu tancau, mannu casi duamilla mètrus cuàdraus, giai sutapostu a secuestru po is matessis biòlatzionis po s'amparu ambientali. In custa àrea fiant scabudadas carcassas de arrodas de màchinas e eletrudomèsticus, materiali plasticu, parti mecanicas de veturas e àteru materiali ferrosu, follus de eternit. Imoi funt in cursu is cìrcas impunnadas a s'apubadura catastali giusta de is terrenus puru po acrarai is sugetus asuba chi at a agravai s'obrigu de bonìfica de is lògus.

Progetu realizadu cun s'agiudu de sa Regione Autònoma de Sardigna
L.R. 26/97 subra sa limba e sa cultura sarda