Acordu in Regione pro sos traballadores in mobilidade in su Sulcis

S'acordu firmadu oe in s'Assessoradu regionale de su Traballu, in favore de 237 traballadores in mobilidade (30 in sa de bator dèrogas, sos chi abarrant in sa de tres dèrogas) de sas 16 aziendas in crisi in su Sulcis Iglesiente, at serradu su caminu longu e tortogiadu inghitzadu unos cantos meses a oe dae sa Regione, cun sa punna de dare acotzu a sos traballadores e a sas famìlias issoro, isbetende de ddos pòdere torrare a insertare in su mercadu de su traballu.

CASTEDDU – S a firma de s'assessore Franco Manca, paris a cussas de sos rapresentantes de sos entes locales, de sas Asl, de Confindustria e de sas Organizatziones sindacales, at permìtidu de fàghere inghitzare fintzas progetos de impreu de custos traballadores pro mèdiu de sa guida Centru servìtzios pro su traballu de sas provìntzias chi lis atenet.

Sas aziendas impinnadas. Sas impresas interessasdas sunt Acentro Ceramica (14 dipendentes in mobilidade), Cardnet (44), Cartiera San Giovanni (1), Cosacem (12), Cosemi (12), Elcos (6), Isoref (2), Mcp (13), Ms Isolamenti (5), Omnia (13), Sices Montaggi (23), Sices Work (17), Sirz (1), Spi (40), Vigilanza Cannas (4) e Ali Alluminio (30). Su 28 de làmpadas coladu aiant firmadu a parte unu acordu a favore de sas impresas de su Sulcis Iglesiente de s'indotu de Enel Sulcis e de Enel Power, pro unu totale de 89 traballadores (totus a sa de 5 pròrogas de sa mobilidade).

S'insertada in su traballu. "A su de 5 atòbios semus resessìdos a fàghere torrare sos contos – at cummentadu s'assessore Manca -.Siat craru, custa no est assistèntzia: sa punna est cussa de torrare a pònnere sas pessones in su mercadu de su traballu e torrare a issos sa dinnidade chi ddis minescet. Atinamus chi no est una solutzione pro totu sos males, ma de unu interventu pro abrandare sos istrobbos a pessones meda, in un'àrea cumplessa chi pranghet de problemas istruturales. Sas Asl sunt sas istitutziones chi pedint de prus de pòdere impreare custos traballadores, mancari gasi isperamus in s'agiudu de sas amministratziones provintziales e comunales in ue abitant sos traballadores de sas impresas in crisi".

Ultimo aggiornamento: 21-07-2010 06:14

Progetu realizadu cun s'agiudu de sa Regione Autònoma de Sardigna
L.R. 26/97 subra sa limba e sa cultura sarda