Referendum, Floris asuba de is abètias: "Torrau a ponni is indennidadis una àutu dèpiu

"S'idea chi su Cunsillu regionali, de manera crabonara, si siat atobiau de noti sceti po fai una lei asuba is propius emolumentus est unu sinnali de cussa contrapolìtica chi merescit àteras analisis e afunguramentus". Ddu narat Mario Floris, s'assessori a is Afarius Giniralis e de is Arreformas chi afirmat chi sa lei aprovada de s'Assemblea est una àutu dèpiu propiu a sa luxi de cumenti est acabau su referendum.

CASTEDDU - "Is indennidadis de su Cunsillu regionali funt previdias de su Statudu sardu chi a s'art. 26 narat: 'is cunsilleris arricint una indennidadi stabilessia cun lei regionali'. Cun su referendum s'est bofiu mudai - aciungit s'esponenti de sa Giunta - is modalidadis de carculu de s'indennidadi stabilessia finas a imoi de s' Ufìtziu de Presidentzia, e no certu abrogai sa norma stadudaria, chi est lei de arrangu costitutzionali. Chena de scaresci chi puru sa Carta fundanti de sa democratzia nosta (art.36 de sa Costitutzioni) stabilessit po totus is traballadoris su deretu a una 'paga giusta'. Si pensat forsis de firmai s'atividadi de su Cunsillu regionali, boghendindi a is trumas de is arresursas de òminis e econòmicas? S'arrecostrutzioni de calincucunu scioberu, a bortas, est prus simpri de cuddu chi parit. Su Cunsillu at pensau, totus de acordiu, de si donai una normadia chi ndi acuntessit sa funtzionalidadi e ddu at fatu in sa primu borta utili, apustis de una dii de dibatu polìticu forti e strunniu. "Su torrai a tzerriai a unu no mellus pretzisau o pensau "tradimentu de su sentidu referendariu", iat a podi sutaintendi - acabat Floris - un imperu no giustu de s'aina leitima de su referendum: cuddu de s'arremprasai a sa funtzioni, arrolu, prerogativas, poderis e arresponsabilidadi de s'Assemblea leislativa sarda".

Progetu realizadu cun s'agiudu de sa Regione Autònoma de Sardigna
L.R. 26/97 subra sa limba e sa cultura sarda