Aperitivi ad Arte, su de duos atòbios in Casteddu
Giòbia 22 de su mese de argiolas, inghitzende dae sas 20:30, in sa Galleria Comunale d'Arte de Casteddu s'at a fàghere su de duos atòbios cun Aperitivi ad Arte. Sa faina est fata onni giòbia de su mese de argiolas e de austu, cumentzende a oras de sas 20:30.
CASTEDDU – Su tziclu de aperitivos, aparitzados cun sa collaboratzione de s'Assòtziu culturale Artècrazia, custu estiu at a tènnere comente impèllida e àndala su "Museo per l'armonia sociale", unu argumentu de atualidade verdadera chi custu annu est istadu su tema de sa Die Internatzionale de sos Museos. Su Museo comente logu de aunimentu e diàlogu ue reconnòschere sa diversidade culturale, promovere e sustènnere s'unidade sotziale fintzas pro mèdiu de su cunfrontu de sas traditziones alimentares.
Sos atòbios. Sos sete atòbios ant a tènnere che protagonistas a paritzas formas de espressadas: dae sa literadura a sa recitatzione, dae sa mùsica a sa dantza, mentras sa traditzione gastronòmica nostra, cun produtos a km zero, s'at a intreverare a sas culturas alimentares de sas comunidades istràngias chi bi sunt in su logu. Custa chida s'aperitivu a km zero at a acumpangiare sa presentatzione de Gianni Olla "Proust e le immagini de Novecento". Dae sa pintura a sa literadura, leada dae s'ùrtimu libru suo. In totu su sero ant a ammaniare visitas guidadas a sa mustra "Da Fattori a De Chirico. I capolavori della collezione Grieco della Pinacoteca di Bari". E pro sos minoreddos b'ant a èssere laboratòrios didàticos ammaniados dae s'assòtziu Orientare.
Progetu realizadu cun s'agiudu de sa Regione Autònoma de SardignaL.R. 26/97 subra sa limba e sa cultura sarda
