Elisa in cuntzertu in Casteddu e in S'Alighera
Elisa, regina de sa mùsica italiana e mama dae pagu tempus, a pustis de duos annos de ausèntzia dae s'iscena natzionale torrat cun sa boghe galana sua fintzas in Sardigna pro duos cuntzertos ammaniados dae Sardinia Entertainment: su 22 de su mese de argiolas in s'Anfiteatru romanu de Casteddu e su 24 de su matessi mese in s'Anfiteatru M.Pia de S'Alighera cun sas balladas rock durches cosa sua (cumentzu a oras de sas 21,00).
Unu live totu nou in ue Elisa at a fàghere ascurtare a sos amantiosos suos sas cantzones de s'ùrtimu album "Heart", e sas cantzones prus de importu de su passadu. Su sound at a èssere cussu de semper: unu rock elètricu e robustu, capatzu de s'abèrrere de repente a divagatziones pop e folk, cun ispàtziu mannu a sas chiterras, presentes siat in sos petzos prus rìtmicos, siat in sas balladas. Subra su palcu acanta a issa ddoi at a èssere sa band chi dae prus de deghe annos la acumpàngiat in su live: Max Gelsi a su bassu, Andrea Rigonat a sas chiterras, Gianluca Ballarin a sas tastieras, Andrea Fontana a sa batteria e Nicole Pellicani e Silvia Smaniotto a sos coros. Su grupu immoe s'arrichit de duos elementos noos: Giacomo Castellano a sa chiterra e Simone Bertolotti a su pianoforte.
Una unda emotiva chi at a contare sos sentidos pro mèdiu de sas cantzones de sos album in antis fintzas a nche lòmpere a sos branos chi ddoi sunt in s'ùrtimu CD, giai dòpiu discu de plàtinu. Unu grandu ispetàculu cun energa meda in ue sa mùsica, sos faeddos, sas màgines virtuales e reales sunt su "coro" verdaderu de s'ispetàculu e de su coro nde chistint e ismànniant s'intumbu. Gasi comente est istadu pro su discu, gasi pro su tour, Heart est su faedu simple e diretu, sèberu pro contare emotziones e àndala de su cuntzertu. Unu cuntzertu, chi at a contare sos sentidos pro mèdiu de sas cantzones de sos album in antis fintzas a lòmpere a sos branos chi ddoi sunt in Heart, essidu su 13 de donniasantu passadu, comente "Ti Vorrei Sollevare", "Anche Se Non Trovi Le Parole", "Someone To Love", oe a ghia de sas classìficas natzionales.
Progetu realizadu cun s'agiudu de sa Regione Autònoma de SardignaL.R. 26/97 subra sa limba e sa cultura sarda
